ILOILO CITY – Nagakabalaka ang kampo ni Iloilo City Lone District Congressman Jerry Treñas nga gamiton ni City Mayor Jose Espinosa III ang calamity fund sa pamulitika.
Ini matapos nga ginpahayag sang kongresista nga gin-release na ang calamity fund.
Sa interview sang Bombo Radyo kay Cong. Treñas, iya ginpahayag nga nagapati siya nga ang calamity fund ang ubuson lamang sang kampo ni Espinosa sa eleksyon sa diin gina-alegar ginhingaw gid nga mapaguwa ang pondo sang Byernes, matapos ang ginhiwat nga special session sa city council.
Suno kay Treñas, may yara sang balor P115 million nga calamity fund kag P57 million nga quick response fund nga mahimo gamiton ang syudad sa diin ini ang tuman ka dako.
Sa subong dugang pa sang natungdan, ginahanda na nila ang kaso nga mahimo ipasaka sa tanan nga yara sa special session sang city council bangud iligal ang ginhimo nga proseso sang mga konsehal sa pagdeklarar sang state of calamity sa syudad kag wala pa sang quorum apang natigayon gid ang ila nga plano.
Samtang, gin-athag ni Iloilo City Administrator Atty. Hernando Galvez nga wala ginhingagaw release ang calamity fund sang Byernes, matapos ang ginhiwat nga special session sang city council.
Sa interview sang Bombo Radyo kay Atty. Galvez, iya ginpahayag nga maathag nga nagakatulog pa si Congressman Jerry Treñas sa kamatuoran kag ang intensyon lamang sini amo nga magpatalang sang impormasyon sa publiko bangud sa iya nga pagpahayag nga gin-release na ang calamity fund.
Suno kay Galvez, wala sang tandugon ang Iloilo City government sa calamity fund bangud kun pila lamang ang balor sang makuha nga tubig sa Metro Iloilo Water District (MIWD), amo lang ina ang kantidad nga ibayad sang city government.
Daw kaangay man nga may ginapabati-batian ang city administrator sa iya nga pagpahayag nga kun nahimo sang iban nga magpangawat sa pondo sang syudad sang unam kuntani indi na sini pag-itudlo sa subong nga administrasyon.
Nagpangabay man si Galvez sa publiko nga indi magpati gilayon sa mga sala nga impormasyon nga nagalapta.
