Ginbuyagyag ni Congressman Leandro Leviste sang Batangas 1st District nga wala sang opisyal nga bidding sa mga proyekto sang Department of Public Works and Highways. Suno sa iya, ginapili na lang ang mga contractor nga may kahilapit sa mga opisyal, kapin pa kun may kickbacks nga ginahatag.
Ginsugid man ni District Engineer Abelardo Calalo kay Leviste ang pila ka ngalan sang mga daku nga contractor kag ang papel sang mga ini sa idalum sang anay nga kongresista. Suno kay Leviste, sa sulod sang 3 ka tuig, posible nga sobra 1 bilyon pesos ang matago para sa isa ka kongresista.
Gindugang pa niya nga ginadul-ong siya sang mga contractor bangud ginainspeksyon niya ang mga flood-control projects sa distrito, kalakip na ang mga proyekto nga madali lang nga maguba. Ginpabutyag niya nga kun nakabaton na sang kickback ang isa ka kongresista, wala na niya ini ginabisita kag ginainbestigaran ang mga substandard nga proyekto.
Nanindugan si Leviste nga dapat matapos na ang korapsyon sa sulod sang Department of Public Works and Highways. kag ginahingyo niya ang mga empleyado kag contractor nga magbulig bilang state witness agud mas mabal-an pa ang kadalumon sang korapsyon.
Ginpasidunggan man niya ang madinalag-on nga tikang ni Secretary Manuel Bonoan, kag ginpabutyag nga handa siya magpakig-angut kun may kinahanglan.
