ILOILO CITY – Wala sang labot si Iloilo City Lone District Cong. Jerry Treñas sa ginapahayag pagbalhin sang Team ALGONA sa Team ALESNA nga kasumpong nga partido sang Team Uswag.
Nahibalu-an nga ang ALGONA ang ginalakipan nanday Iloilo City Councilor Joshua Alim, Dr. Pacita Gonzalez kag Iloilo City Councilor Plaridel Nava.
Sa ALESNA naman, ini ang ginalakipan nanday Alim, Iloilo City Mayor Jose Espinosa III kag Nava.
Sa interview sang Bombo Radyo kay Treñas, iya ginpahayag nga indi siya makahatag sang sabat tuhoy sa estado sang Team ALGONA.
Ginpahayag sang mamalidha nga Team ALGONA man ukon Team ALESNA, indi ini makaapekto sa iya kadidatura sa pagka-alkalde sa syudad sang Iloilo.
Sa pagkamatuod suno sa natungdan, madamo pa sang mga importante nga butang nga dapat niya hatagan sang atensyon kasubong sang ginapahayag pagpangkakas kag pagpahog sa mga government employee ukon barangay official nga indi magsuporta sa kandidatura sang iya mga kasumpong sa pulitika.
Samtang, suno naman kay Iloilo City Mayor Jose Espinosa III, wala sang permanente sa pulitika.
Ginpahayag sa Bombo Radyo ni Espinosa nga isa lang ang iya nga mapromisa kag ini amo ang iya pagkatampad sa iya partido kag wala na siya nagapahilabot sa grupo sang iban nga kandidato.
Nahibalu-an nga nangin halangpon ang sabat ni Dr. Pacita Gonzalez tuhoy sa iya mga kaupod sa Team ALGONA.
Suno kay Gonzalez, nagapabilin anga iya ‘loyalty’ sa Team ALGONA apang indi siya makapasalig kun kasubong man sa iya ang panindugan sang mga kaupod nga pulitiko.
