Gin-file sa Kamara ang isa ka resolution agud nga magpatawag sang congressional inquiry kaangot sa insidente kun sa diin nabalda ang 17-anyos nga taekwondo practitioner matapos ang sparring batok sa isa ka black belter.
Suno kay House Deputy Majority Leader Erwin Tulfo nga amo ang author sang House Resolution 1670, bangud sa sini nga insidente, dapat man nga bukaron ang safety protocols, supervision, kag mga regulasyon sa bilog nga taekwondo community ilabi na ang nagakaigu nga match-ups sa tunga sang bag-uhan pa lamang.
Ginsaad pa sa resolution nga dapat nga may katungdanan ang coach nga siguruhon nga ang training sessions sang mga menor de edad ang ginapatigayon sa paagi nga indi man sila makaangkon sang injury.
Matandaan nga sang damlag lang nag-agaw sang atensyon ang kaso sang 17-anyos nga babaye nga yellow-belt taekwondo athlete nga nakaangkon sang madamo nga injuries matapos nga gin-set up ini sang iya coach nga mag-spar sa isa ka black belter nga 20 kilos nga mas mabug-at sa iya.
Bangud sa amo nga sparring session, nahalitan ang ilong sang bata, may facial contusion, nagpalamanog ang ibabaw nga bahin sang iya nga bibig, kag nagapalanakit ang bag-ang.
Sa affidavit sang bata, nakasaad man nga ginbatas sini ang ginhimo sang iya coach bangud gusto sini nga indi madula ang iya nga scholarship sa Jesus is Lord Colleges Foundation, Inc. sa Bocaue, Bulacan.#
