ILOILO – Indi masolbar sang pagpaninlo lamang ang pagtapna sang Dengue Hemorrhagic Fever.
Ini ang rason ni Iloilo 1st District Congresswoman Janette Garin sa pagduso nga ibalik ang kontrobersyal nga Dengvaxia vaccine.
Sa interview sang Bombo Radyo kay Garin, iya ginpahayag nga iya gid nga ginadayaw ang lihok ni Iloilo Gov. Arthur ‘Toto’ Defensor Jr. nga ipaidalom sa Dengue outbreak ang probinsya kag ipatuman ang ‘Do Day Kontra Dengue Drive’.
Sa pihak sini, ginpahayag ni Garin nga pinaka-epektibo nga solusyon agud nga matapna ang Dengue Hemorrhagic Fever amo ang bakuna.
Suno kay Garin, wala sang garantiya nga ang mga naka-agi na sang Dengue Hemorrhagic Fever ang indi na matapikan sang balati-an.
Sa subong nga tig-ululan, indi malayo suno sa mamalidha nga mas magadamu pa gid ang maka-angkon sang Dengue Hemmorrhagic Fever.
Kun indi man pagpahanugutan sang gobyerno nga magpatigayon sang vaccination program gamit ang Dengvaxia, kun tani mangin available ini sa mga balaligyaan para sa mga pasyente nga maluyag magbakal sang nasambit nga bakuna.
Sa pagkamatuod suno sa natungdan, ang Dengvaxia vaccine ang ginagamit sang iban nga pungsod agud nga matapna ang Dengue Hemorrhagic Fever.
