Wala na-imbitar sa committee hearing sa Iloilo City Council ang head sang Public Safety and Transportation Management Office (PSTMO) nga si Mr. Jeck Conlu sang gin-amyendaran na ang ordinansa kaangot sa amo nga opisina kag ginhimo nga Public Order and Safety Management Office (POSMO).
Sa interview sang Bombo Radyo kay Conlu, iya ginpahayag nga kun nahatagan kuntani siya sang imbitasyon para sa hearing, mas napaathag sini ang functions sang opisina agud nga maklaruhan ang importante nga mga bagay kaangay sang plantilla positions.
Nahibaluan nga sa hearing naistoryahan ang plantilla ukon permanent positions nga sayluhon halin sa POSMO pakadto sa Transportation and Traffic Management Office (TTMO).
Suno kay Conlu, wala man napamangkot ang iya opinyon kun kinahanglan pa ukon indi na ang ini nga posisyon ukon kun kinahanglan i-rename.
Pahayag pa sang opisyal, isa pa kuntani sa gin-raise amo nga indi pwede mahimo nga section lang ang Public Order and Safety bangud tuman ini ka daku kag nagakadapat nga himuon nga division.
Nahibaluan nga nag-request ini sang kopya sang ordinansa sa opisina sang committee chair nga si Councilor Rex Marcus Sarabia agud mapadalman kag makahatag sang suhestyon.
