ILOILO CITY – Daku ang mangin katungdanan sang Korte Suprema sa pagdesisyon tuhoy sa constitutionality sang Anti-Terror Law.
Matandaan nga sang Hulyo 3, ginpirmahan ni Presidente Rodrigo Duterte ang kontrobersyal nga Anti-Terrorism Act kun sa diin ang panibag-o nga layi ang mangin epektibo sa Hulyo 18.
Kun basehan ang paathag sang gobyerno suno kay Atty. Joenar Pueblo, ang Anti-Terror Law ang may maayo nga katuyu-an ilabi na sa pagtapna sang lapnagon nga problema may kaangtanan sa terorismo.
Suno kay Atty. Pueblo, pila lamang sa mga rason kun nga-a ginpirmahan ini sang Presidente amo nga indi bastante nga ang National Defense Act lang ang ipatuman, mahimo nga napilitan lamang ang Pilipinas agud nga indi pag-isikway sang international community kag ang leksyon tuga sang natabo nga Marawi Siege.
Bilang Law expert, ginpahayag ni Atty. Pueblo nga wala sang malain sa nasambit nga layi bangud nga lapnagon na ang problema sa insurhensya apang indi man mahinago suno sa iya nga mahimo ini abusaran sang implementing agencies.
Sa pagpaathag sang natungdan, ang pagbalay tubtub nga ang pagpasar sini ang kasubong nga ginpadali-an lamang kag ang gintutukan lamang amo ang pagdakop sa mga terorista kun ipaanggid sa kun ano ang negatibo nga epekto sini sa sibilyan.
Nahibalu-an nga nakasaad sa probisyon sang nasambit nga layi nga mahimo nga madakop kag mapreso sang 14 ka adlaw kag dugang pa gid nga 10 ka adlaw ang mga ginadudahan nga terorista apisar nga wala sang warrant of arrest.
