ILOILO CITY – Dako nga palamangkutanon subong sang local government sang Oton kun sa diin na ang A.C Ong Consulting Incorporated nga amo ang consultant sa pagkaayo sang municipal hall sang banwa.
Abril 2023 sang gin-untat sang contractor nga RRL Builders ang pag-construct sang munisipyo.
Sa interview sang Bombo Radyo kay Oton Vice Mayor Neil Olivares, iya ginpahayag nga ang consultant ang napilian sang tuig 2019, sa tyempo pa sang anay administrasyon ukon sa liderato ni anay Mayor Carina Flores.
Suno kay Vice Mayor Olivares, indi makapadayon ang contractor sa pagkaayo sang municipal hall bangud dapat nga may yara sang consultant.
Santu sa RRL builders, sadto anay sa zoom lang gid nagatambong ang consultant kag wala ini nagapakigkita personal.
Tubtob nga sang ulihi, wala na gid ini nagasabat kun tawgan kag natukiban nga Makati-based ang consultant nga sang pagchekyar man didto, wala sang may naga-eksister nga amo nga consulting firm kag naglain naman ang ila nga address.
Makapila naman ginpadal-an sang sulat apang wala man sang sabat.
Ginkwestyon man sang bise alkalde kun ngaa didto pa sa Makati nagkuha sang consultant kun madamo man diri sa iloilo.
Nahibaluan man sang local government nga sang Marso 2022 sang anay administrasyon ang nagapungko, nabaydan na sang municipal treasurer ang consultant sang 70 percent ukon P4. 2 million sa contract price nga P 5.9 million.
Bangud sini, sunod nga himuon sang local government sang Oton amo nga i-terminate ang contract sang AC Ong Consulting Inc.
Imbestigaran man sang Sangguniang Bayan kun bala, nag-agi sa proseso ang bidding process sa bahin sang Bids and Awards Committee ukon kun credible bala ang Ac Ong Consulting Inc.
Sa sUbong, yara pa lang sa 15 to 20 percent ang pagkaayo sang municipal hall nga dapat kuntani sang Disyembre 2022 pa ini natapos bangud 2019 pa lang sang gin-authorize na nga magsulod ang Oton sa contract sa AC Ong Consulting Inc., kag 2021 pa may contract naman ang ang RRL Builders.
Ang consultant amo kuntani ang magaplano sang rehabilitation sang munisipyo.
