Wala na sang kabuhi sang nasapwan sang iya kaupdanan ang isa ka construction worker sa sulod sang ila barracks sa construction site sa gwa sang A. Montes II Elementary School sa Brgy. Sto. Rosario Duran, Iloilo City.
Ini amo si Ronald Gatallo, 49-anyos, residente sang Sitio Ilaya Brgy. 2, Ilog, Negros Occidental.
Sa interview sang Bombo Radyo kay Gio Gerola, kaupod ni Gatallo, iya ginpahayag nga pasado ‘las 6 sini nga aga sang ginpukaw ang biktima agud nga mag-pangape bangud gindumdom sini nga naburawan lang ini.
Didto kag nakita nga wala na ini nagaginhawa, mayami kag matig-a na ang lawas sang biktima.
Antes masapwan, nagpacheck- up pa ang biktima bangud nagareklamo ini nga nagasakit ang iya dughan kag madasig ini makapoy.
Nagapati ang kaupdanan sang biktima nga wala sang foul play sa kamatayon sini.
Nahibaluan nga isa ka tuig na nga nagatinir sa barracks ang biktima bangud sa ongoing nga construction sang opisina sang DEPED.
