ILOILO – Patay ang isa ka construction worker matapos naaksidente ang ginamaneho nga motorsiklo sa Barangay Igcocolo, Guimbal, Iloilo.
Ang biktima amo si Eurice Tamesis, 24 anyos, residente sang Barangay Adgao, Tubungan, Iloilo.
Sa interview sang Bombo Radyo kay Pol. Lt. Nelson Caro, hepe sang Guimbal Municipal Police Station, iya ginpahayag nga naghalin sa Tubungan ang biktima kag padulong kuntani sa Guimbal town proper.
Ginpahayag sang hepe nga tuyo kuntani ni Tamesis nga mag-overtake sa isa ka top down ukon ‘tangkal tangkal’ apang nadulaan sang kontrol bangud may yara sang nagapadulong nga truck.
Posible suno sa pulis nga nagsala ang driver rason nga natumba kag nalampos ang ulo sa semento.
Suno kay Caro, wala sang helmet kag nakainom sang makahulubog nga ilimnon ang biktima.
Ginapahayag man nga madasig ang dalagan sang motorsiklo.
Nakaangkon man sang menor nga pilas sa lawas ang angkas sa motorsiklo nga isa man ka construction worker.
