Nasapwan nga wala na sang kabuhi kag may dako nga pilas sa iya liog ang isa ka construction worker sa Barangay Balabago, Alimodian, Iloilo, kahapon nga adlaw, ala-7:30 sa aga.
Ini amo ang ginkilala kay Marvin John Gallego, 49-anyos, kag residente sang Brgy. Sinamay, Alimodian.
Sa interview sang Bombo Radyo kay Police Captain Chrysler Ledesma, hepe sang Alimodian Municipal Police Station, iya ginpahayag nga nasapwan ang indibidwal nga nagapaligo na sa iya kaugalingon nga dugo kag wala na sang kabuhi.
Suno pa kay Ledesma, Nakita man nga malapit sa bangkay ang isa ka ispading nga ginapatihan gingamit sini agud nga utason ang iya kaugalingon nga kabuhi.
Nagapati man ang asawa sini nga si Meriam Gallego nga matuod nga gin-utas sang iya bana ang kaugalingon sini nga kabuhi.
Sa interview sang Bombo Radyo kay Meriam, iya ginpahayag nga umpisa sang nadakpan sa buybust operation ang iya nga abyan, didto na sang nagsugod ang kakulba sini nga maulamid man sya sa isyu sang droga.
Dugang pa niya nga wala sang kun sin-o man nga kuntra si Marvin, rason nga nagapati man ini nga wala sang foul play sa kamatayon sang iya bana
