ILOILO CITY – Mapatawag sang consultative meeting, bwas, Hunyo 5 si Iloilo City Councilor Romel Duron sa mga Punong Barangay nga nagpirma sa letter of condemnation batuk kay Public Safety and Transportation Management Office Head Jeck Conlu.
Sa interview sang Bombo Radyo kay Councilor Duron, chairman sang committee on good government, iya ginpahayag nga ang ini nga lihok ang pamaagi agud mahibalu-an ang kawsa sang mga punong barangay kag kun ano ang luyag sang mga ini matabo.
Suno kay Duron, kahapon, Hunyo 3, naka-istorya naman si Conlu kag Councilor Jojo Javellana kaupod man si Vice Mayor Jeffrey Ganzon kag nahitso na ang ila indi pag-hangpanay.
Dugang pa sang natungdan, mas maayo nga ma istoryahan sang maayo ang problema agud nga kun may yara sang sala, mahimo pa ini nga matadlong.
Nahibaluan nga ang tension sa tunga sang mga punong barangay kag sang PSTMO ang nag ugat sang gindakop sang traffic aid ang tanod commander sang Nabitasan, LaPaz nga nagamaneho sang barangay tricycle patrol sa national road agud kuntani nga magpadulong sa animal bite center bangud ginkagat sang tutoy ang iya isa ka tuig nga anak.
