ILOILO CITY-Nangin maayo ang resulta sang ginpatigayun nga consultative meeting sang mga punong Barangay sa distrito sang La Paz, kaupod ang isa ka konsehal sang syudad kag ang pinuno sang Public Safety and Transportation Management Office.
Ini matapos sang mga kontrobersiya nga nagginuwa tuhoy sa pagkadakop sa isa ka barangay patrol nga magadala kuntani sang isa ka tuig nga bata nga ginkagat sang ido sa animal bite center.
Sa interview sang Bombo Radyo kay Punong Barangay Marjorie Gregorios, Presidente sang Association of Barangay Captains sa distrito sang La Paz, iya ginpahayag nga nangin matalunsay ang pag-inistoryahanay kag nangin maayo ang resulta.
Suno kay Gregorios, naresolba na ang problema bangud man sa ila pagpakig-angot kay Public Safety and Transportation Management Head Jeck Conlu, lakip na ang pagpabutyag man nila sang ila sentimento.
Pahayag pa niya, indi na nila pagdayunon pa ang condemnation letter batok kay Conlu , bangud nahisugtan kag naklarohan na ang tanan.
