Magapasaka sang kaso ang consumer’s right advocacy group nga One Panay Consumers Association, Incorporated (OPCAI) sa Panay Electric Company (PECO).
Sa interview sang Bombo Radyo kay Atty. Ricsan Trox Tormon, spokesperson sang OPCAI, iya ginpahayag nga magapasaka sila sang kaso sa PECO agud marefund ang meter deposits sang mga consumers.
Suno kay Tormon, magluwas sa refund, plano man nila nga magpasaka sang separado nga administrative case sa Energy Regulatory Commission (ERC) batok sa PECO.
Nagpanawagan man ang OPCAI sa iban pa nga consumers organization nga magpasaka sang kaso agud nga mas mapabug-at ang ila nga reklamo.
Magluwas sa paghire sang grupo sang mga accountant, abogado kag mobilizers agud mapadayon ang inisyatibo, magatukod man sila sang kyosko sa mga establisyemento komersyal agud magtipon sa mga interesado nga magpamyembro sa OPCAI kag ipahibalo sa mga konsumidor ang ila mga plano.
Ginkumpirma man ni Tormon nga may P 24 million pa nga refundable ang 24 ka mga myembro nga ila ginatiglawas.
Matandaan nga sang Setyembre 23, 2020 nagmando ang ERC sa PECO nga i-refund ang P527.7 million sa mga konsumidor para sa ila “over-recoveries” humalin sang Enero 2012 tubtob Disyembre 2014.
Ang mando ang ginalakipan sang P358.4 million para sa Generation Rate, P 162.9 million para sa Systems Loss Rate, P6.2 para sa Lifeline Subsidy, P149,000 para sa Inter-Class Cross Subsidy, kag P112,000 para sa Transmission Rate.
