ILOILO CITY – Blangko pa sa subong ang template tracing sang Department of Health 6 may kaangtanan sa paghibalo sa mga naka-angkon sang close contact sa personnel sang Bureau of Jail Management and Penology nga nagpositibo sa Coronavirus Disease 2019 (COVID-19).
Sa interview sang Bombo Radyo kay Dr. Mary Ann Sta. Lucia, cluster head sang Health Promotion sang Department of Health 6, iya ginpahayag nga sa subong, ang Local Government Unit sang Zarraga ang nagapanguna sa contact tracing ilabi nga sa nasambit nga banwa nagapauli ang COVID-19 positive.
Suno kay Sta. Lucia, sa subong, may ginpaidalom na sa isolation sa nasambit nga banwa ilabi na ang mga naka-upod sa balay sang BJMP personnel.
Ginpahayag ni Sta.Lucia nga nagapakig-angot ang ahensya sa Local Government Unit sang Zarraga apang wala pa sang may napasa nga official report.
Wala direkta nga nasabat ni Sta. Lucia kun bala may salabton ang BJMP personnel sa pagpadayon sang trabaho kag pagpadulong sa Antique apisar nga nagpositibo na sa virus.
Mas makapaayo suno sa natungdan nga ang Bureau of Jail Management and Penology na lang ang maghatag sang sabat tuhoy sa violation sang nasambit nga pasyente.
