ILOLILO CITY – Padayon ang contact tracing sa mga naka close contact sang COVID-19 patient gikan sa syudad sang Iloilo nga nagdugang sa listahan sang kumpirmado nga kaso sa Western Visayas.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang mga personnel gikan sa City Health Office ang nagapatigayon sang contact tracing matapos nga nagpositibo sa COVID-19 ang Patient #17 nga amo ang 44 anyos nga lalaki gikan sa Iloilo City.
Ginatugyan na lang sang alkalde sa Department of Health ang paghingadlan kun sa diin nga distrito naghalin ang nasambit nga pasyente.
May kaangtanan diri, ginpahayag man ni Treñas nga kada adlaw, may yara sang donasyon nga nabaton ang Iloilo City Government kag gilayon man ini nga ginapanghatag sa mga pumuluyo.
Sa pagpaathag sang alkalde, ginatunga sa 70,000 households ang mga ginadonar nga food packs samtang gilayon man nga ginahatag sa medical frontliners ang Personal Protective Equipments nga gindonar ukon ginbakal sang Iloilo City Government.
Padayon man ang pagpanghatag sang ayuda sa mga driver kag vendors nga apektado sang Enhanced Community Quarantine.
Kadungan sini, ginmandu-an sang alkalde ang otoridad nga dakpon kag presuhon ang mga maaktuhan nga nagahimu sang malain batok sa medical frontliners.
