ILOILO CITY – Padayon ang contact tracing may kaangtanan sa 2 ka COVID-19 positive nga nagpadulong sa talatapan ni Iloilo City Mayor Jerry Treñas.
Sa interview sang Bombo Radyo kay Dr. Roland Jay Fortuna, focal person for COVID-19 sang Iloilo City Government, iya ginpahayag nga ang duha ka COVID-19 positive ang makabig nga Authorized Persons Outside Residence halin sa Metro Manila kag asymptomatic.
Suno kay Fortuna, ang duha ka pasyente ang kabahin sang isa ka grupo nga naghatag sang donasyon sa Iloilo City Government kun sa diin naka-angkon sang exposure ang alkalde.
Ginpahayag ni Fortuna nga wala man sang 15 minutos ang exposure sang alkalde kag naka-suksok man sang face mask ang mga nagasulod sa City Hall apang bilang protocol, regular na ang pagpatigayon sang disinfection sa building.
Ginalauman nga makahatag gilayon sang update ang contact tracing team agud nga mahibalu-an kun sanday sin-o pa gid ang mga naka-angkon sang close contact.
