BATAD,ILOILO – Nagapadayon ang contact tracing sa mga naka close contact sang 56 anyos nga babaye nga residente sang Batad, Iloilo nga nagpositibo sa Coronavirus Disease 2019 (COVID-19).
Ang COVID-19 patient amo si WV 585 kag naka-admit sa subong sa Western Visayas Medical Center.
Sa interview sang Bombo Radyo kay Mayor Elvira Alarcon, iya ginpahayag nga Hunyo 30 sang gin-admit si WV 585 sa Jesus M. Colmenares Memorial District Hospital bangud naglain ang iya pamatyag kag nagapalanakit ang iya nga lawas.
Apang antes ini magpadulong sa ospital, nagpahilot pa ini sa pagdumdom nga makuha gilayon ang pagpalanakit sang iya lawas.
Sa findings sang doctor, natukiban nga may yara sang pneumonia ang pasyente kag heart failure.
Walo ka adlaw gin-admit si WV 585 kag naka-guwa man sa ospital.
Apang Hulyo 9 sang nakabatyag ini liwat sang pagpalanakit sang dughan kag gin-pray over pa ini sang isa ka pastor.
Sa amo man nga adlaw, gindala si WV 585 sa ospital sa Sara, Iloilo sakay sa ambulansya apang gin-refer ang pasyente sa Western Visayas Medical Center kag natukiban nga positibo ang pasyente sa COVID-19.
