ILOILO CITY – Amat-amat na nga ginatapos ang contact tracing kasunod sang na record nga local transmission sang Coronavirus Disease 2019 (COVID-19) sa syudad sang Iloilo.
Sa interview sang Bombo Radyo kay Dr. Roland Jay Fortuna, COVID-19 focal person sang Iloilo City Government, iya ginpahayag nga sa bahin sang Bo. Obrero sa Lapuz kag sa Brgy. Pali Benedicto sa Mandurriao, natumod naman ang mga close contacts sang mga pasyente.
Sa bahin sang Brgy. Pali Benedicto kun sa diin may yara sang mga residente sang banwa ang Lambunao nga close contacts sang pasyente, automatic na suno kay Dr. Fortuna nga ginapasa sa Provincial Health Office ang katungdanan sa contact tracing.
Ginpahayag ni Fortuna nga nakapakig-angot naman ang tagdumalahan sang West Visayas State University Medical Center sa City Health Office kasunod sang lockdown nga ginpatigayon sa Outpatient Department, Pedia Ward kag Medical Charity Ward nga ginpatigayon matapos nga may health worker kag mga pasyente nga nagpositibo sa COVID-19.
Sa bahin naman sang mga empleyado sang Iloilo City Hall nga nagpositibo sa virus, ginpahayag sang natungdan nga natumod naman ang mga close contacts, na-isolate kag ginpaidalom na sa COVID-19 test.
Sa pihak sini, indi apektado ang trabaho sa Iloilo City Hall kun sa diin may yara naman sang disinfection nga ginpatigayon.
