ILOILO CITY – Mas pasangkaron pa gid ang contact tracing sa syudad sang Iloilo.
Ini ang pahayag ni Mayor Jerry Treñas kasunod sang ginpatigayon nga lockdown sa duha ka mga barangay bangud sa Coronavirus Disease 2019 (COVID-19).
Sa interview sang Bombo Radyo kay Treñas, iya ginpahayag nga kinahanglan nga pasangkaron ang contact tracing agud nga indi na madugangan ang numero sang local transmission sang virus.
Suno kay Treñas, ang contact tracing kag ang madasig nga pagpaguwa sang COVID-19 results ang ginakabig liyabe sa pagtapna sang pandemya.
Ginpahayag ni Treñas nga indi na kun tani masulit ang ginpatigayon nga lockdown sa pila ka zona sa Bo. Obrero sa Lapuz, kag sa Pali Benedicto sa Mandurriao.
Sa Brgy. Pali Benedicto, extended tubtub Agosto 1 ang ginapatuman nga Surgical Enhanced Community Quarantine sa Zone 2 kag Zone 5 kun sa diin may pila na ka mga residente nga ginkuhaan sang swab sample matapos naka-angkon sang close contact sa isa ka COVID-19 positive.
Ginaduso nga pagahimuon nga temporaryo nga testing laboratory ang Alternative Learning System building sa Molo samtang wala pa natapos ang ginatukod nga laboratoryo.
