Nagpangayo na sang pasaylo ang content creator nga si Euleen Castro ukon mas kilala sa tawag nga “Pambansang Yobab” matapos ang kontrobersyal niya nga video sa isa ka popular nga coffee chain sa Iloilo.
Sa latest video nga gin-post niya sa iya youtube channel, ginpamangkot siya sang kaupod nga content creator kun may sala gid man ini sa natabo, kag ang sabat ni Castro amo nga may yara siya sang kakulangan.
Pahayag niya, ang kulang niya amo nga wala siya sang disclaimer kag indi constructive ang iya ginhimo.
Depensa niya, opinyon lamang niya ang iya ginpabutyag kun sa diin, suno sa iya, wala gid man siya nanamitan sa pagkaon.
Nagpangayo naman ini sang dispensa sa tag-iya kag sa mga empleyado sang coffee chain bangud sa natabo.
Samtang, gin-ako naman ni Castro nga nakibot siya sa nabaton nga “hate” halin sa mga tawo.
Suno sa iya, apisar nga sa kape kag sa pagkaon lang ang sentro sang iya content, apang kaangay nga bilog nga pagkatawo na niya ang ginkaugtan sang publiko.
