ILOILO – Ginatutukan sang quality assurance team ang kaundan sang modules nga ginahatag sa mga estudyante.
Ini ang reaksyon sang Department of Education – Schools Division of Iloilo may kaangtanan sa naga-viral nga post sa social media may kaangtanan sa sala nga content sang modules nga ginahatag ilabi na sa Elementary students.
Sa interview sang Bombo Radyo kay Lilibeth Larupay, Learning Resources Supervisor, DepEd – Schools Division of Iloilo, iya ginpahayag nga may yara sang quality assurance team nga amo ang nagasigurado nga wala sang sala sa content sang modules antes ihatag sa mga estudyante.
Suno kay Larupay, bangud sa tuman ka lip-ot nga tion nga ginhatag, indi man malikawan nga may yara sang sala sa content apang sa bahin sang Schools Division of Iloilo, lunsay typographical error lamang ang makita sa modules.
Ginpahayag ni Larupay nga mahimo nga sa iban nga probinsya ukon rehiyon ang nag-viral nga modules kun sa diin makita nga wala nagasanto ang question kag ang ginapili-an nga sabat.
Kun may yara sang sala sa modules nga nahatag na nga daan sa mga estudyante, ginpahayag sang natungdan nga mas makapaayo nga gilayon ini nga ipalab-ot sa mga manunudlo agud nga mapangitaan sang paagi.
