Ginpa-Bombo sang pamilya sang contractual employee nga nagatrabaho sa munisipyo sang San Dionisio, Iloilo ang indi pahglakip sa pangalan sang empleyado nga makabaton kuntani sang iya delayed nga sweldo.
Sa interview sang Bombo Radyo kay alyas Monica, misis sang contractual employee, iya ginpahayag nga Hulyo sang nag-umpisa sa trabaho ang iya bana kag ang nabutang sa kontrata, kada 15 kag 30 ang sweldohanay apang tubtob subong wala ini makabaton.
Suno kay Monica, wala man sang eksplinasyon ang local government unit kun ngaa delayed ang sweldohanay.
Apang sang ginpahibalo ang empleyado sang kaupod niya nga nakabaton na ini sang sweldo, ginkatingala na lang sini nga wala pa siya masweldohan.
Natukiban nga wala ang pangalan sang bana ni Monica sa listahan sang mga contractual employees kag nagpasalig nga balikan sa Septyembre 13 agud i-check kun ara na ang pangalan sang empleyado.
Bukas naman ang Bombo Radyo sa paathag sang LGU-San Dionisio.
