Ginpauntat na ni Manila third district councilor candidate Mocha Uson sa iya team ang paggamit sang jingle nga ginsaway sang Commission on Elections (Comelec).
Ini amo ang partikular nga campaign material nga may lyrics nga “Cookie ni Mocha, ang sarap-sarap!” nga gina-sulit-sulit kag gina-sautan pa ni Uson sa videos nga nagalapta online.
Suno kay Uson, ginapa-repaso na sini ang tanan nga content sang iya mga materyales sa pagpangampanya agud masiguro nga nagasanto ini sa standards sang poll body sang pagka-disente kag husto para sa public discourse kag electoral engagement.
Sa sulat sang Comelec task force kay Uson sang nagligad nga Abril 8, ginsiling nga mahimo man magamit ang puns kag double meanings bilang literary devices sa mga kampanya, apang kuntani, indi lang ini paggamiton nga ma-distract ang tawo sa kun ano gid ang political platform.
Ginpaathag man sang poll body nga ang “sexually suggestive elements” ang mahimo makadula sang seryoso nga diskusyon nahanungod sa polisa, pang-gobyerno, kag buwasdamlag sang mga komunidad.
Nagpasalig naman si Uson nga gina-respeto sini ang importansya sang “respectful, inclusive, kag age-appropriate tone” sa campaign communications, kag siya kag ang iya team ang committed man sa makahulugan nga dayalogo para sa komunidad.
Si Uson ang na-involve man anay sa kaangay nga kontrobersiya sang siya pa ang nagapungko nga assistant communications secretary sa idalom ni anay Presidente Rodrigo Duterte bangud sa malaswa man nga dance video nga naga-promote sang federalism. Sang 2022 elections, nagpadalagan si Uson bilang isa sa nominees sang Mothers for Change (Mocha) party-list apang nalutos.
