Natalana nga umpisahan na buwas, Mayo 5, ang operasyon sang mga cooling centers sa Iloilo City.
Sa interview sang Bombo Radyo kay Engr. Neil Ravena, head sang General Services Office, iya ginpahayag nga una nga maga-operate bwas ang cooling centers sa Diversion Road, Mandurriao kag sa General Luna, City Proper.
Nahamtang sa kilid sang approach sang Jalandoni Bridge ang cooling station sa General Luna Street.
Sa masunod nga mga inadlaw naman mahimo buksan ang cooling center sa Plazoleta Gay sa downtown area.
Suno kay Ravena, may mga katapo sang City Social Welfare and Development Office kag City Health Office nga maga-manage sang kada cooling station kag mag-assess sang mga pumuluyo kun kinahanglan sang atensyon-medikal.
Maga-operate ang pasilidad halin 10:00 a.m. tubtob 4:00 p.m.
Hatagan sang limitado nga oras nga 30–60 minutos ang kada tawo agud mahatagan man sang tion ang iban magluwas lang kun may nagakinahanglan gid sang gilayon nga medical attention.
Ang pasilidad may yara sang air-conditioning unit, shaded seating, kag water dispensers.
Ang mga target users gid amo ang mga commuters, senior citizens, kag mga residente nga vulnerable sa tuman ka init.
