Naglab-ot sa 10,000 ka mga protesters ang nagpatigayon sang hublag protesta sa dalan sang Glasgow sa Scotland samtang nagapanawagan sa mga lider sa kalibutan sang madasig nga lihok agud matapna ang climate crisis.
Nagawagayway sang banners, nagapulpog sang drum kag nagasinggitan ang mga demonstrador lakip na ang mga myembro sang trade unions kag faith organizations amo man ang mga aktibista nga nagtipon sa dalan sang host city sang 2021 United Nations Climate Change Conference (COP26).
Suno kay Climate activist Greta Thunberg, “failure” ang COP26 climate summit nga nangin public relations event.
Ini bangud pahayag niya, nagapahamot lang ang mga lider pinaagi sa paghatag sang manami nga speech kag pag-announce sang commitments kag targets apang sa likod sini amo ang pag-refuse sa gihapon nga maghimo sang tikang agud matapna ang krisis sa bilog nga kalibutan.
