Ginplastar sang isa ka maritime law expert nga posible nga ginagamit sang China bilang materyales sa dekorasyon, ornaments, kag alahas ang mga corals nga ginpahayag gin-harvest halin sa West Philippine Sea.
Suno sa eksperto nga kay Professor Jay Batongbacal nga director sang University of the Philippines Institute for Maritime Affairs and Law of the Sea, ang ginalagas amo corals kag ang mga species amo man ang giant clams sa idalom sang reef.
Tanan ini suno sa iya ang ginagamit sa paghimo sang dekorasyon. Ginabaylo ini sa ivory, ginahimo nga mga estatwa, samtang ang corals naman ang ginahimo nga jewelry.
Ginpaathag man sini nga kun i-harvest ang corals, indi lamang environment sa dagat ang mahalitan kundi pati ang food security sang pungsod bangud nga nagakadula ang puluy-an sang mga isda gani naga-buhin man ang ila nga reproduction nga mahimo mangin rason nga magnubo ang ila nga populasyon.
Ini kaangot sa report sang Armed Forces of the Philippines Western Command nga may kaso sang “massive coral harvesting” sa Rozul (Iroquois) Reef nga yara sa sulod sang exclusive economic zone sang Pilipinas.
Nadislkubrehan ini sang nagpadala ang militar sang divers agud nga maghimo sang underwater survey sa area nga bag-o lang ginhalinan sang militia vessels sang China.
Wala na ang corals sang amo nga tion suno sa report kag may nabilin na lamang nga mga debris.
Indi pa pinal suno sa militar kun China gid ang may kahimuan apang kun sin-o man ang responsable sa amo nga buluhaton ang pat-od nga nagalapas sa sovereign rights sang Pilipinas. #
