ILOILO CITY – Kombinasyon sang kaanyag, kaalam kag abilidad ang ginapangita sa Miss Iloilo 2020.
Sa Good Morning Philippines program, ginpahayag ni Raymond Villanueva, Binibining Pilipinas Executive Committee Member, pageant mentor, director/fashion designer, nga kun kaanyag lang ukon kaalam lang, indi ini bastante nga basehan agud nga makakuha sang major crown sa labing una nga edition sang Miss Iloilo.
Suno kay Villanueva, ang kilalahon nga Miss Iloilo ang kinahanglan nga may yara sang kombinasyon sang kaanyag kag kaalam agud nga itiglawas kag itib-ong ang Iloilo sa national kag international pageants.
Ginpahayag ni Villanueva nga kinahanglan man nga tutukan sang winning candidates ang ila tagsa ka adbokasiya sa katuyu-an nga makabulig sa isig ka tawo.
Bilang Binibining Pilipinas Executive Committee Member, ginpahayag sang natungdan nga wala siya nagpangindi sang ginhatagan sang kahigayunan nga mangin creative consultant sang Miss Iloilo.
Ini bangud nga magluwas nga isa siya ka Visayan, luyag niya suno kay Villanueva nga madala sa Miss Iloilo ang mataas nga standards sa patag sang pageantry.
Tatlo ka korona ang nagahulat sa deserving nga Ilongga Beauty Queen sa coronation night sang Miss Iloilo 2020.
Sa Good Morning Philippine Program, ginpahayag ni Gerlin dela Cruz, coordinator sang nasambit nga pageant, nga ang coronation night sang labing una nga edition sang Miss Iloilo ang patigayunon sa West Visayas State University Cultural Center sa Enero 23.
Suno kay dela Cruz, antes pa man ang coronation night, balantayan ang Casual Wear Competition and Fashion Show nga patigayunon sa SM City Iloilo sa Enero 11, Talent Competition nga patigayunon sa Festive Walk Mall sa Enero 18 samtang sa Enero 19 naman ang Outreach Program nga patigayunon sa Robinson’s Place Iloilo.
Ginpahayag ni dela Cruz nga ang tatlo ka mga korona nga mahimo madag-an sang deserving nga kandidata amo ang Miss Iloilo 2020, Miss Iloilo Dinagyang 2020 kag Miss Iloilo World 2020.
Magluwas sa tatlo ka korona, may yara man sang First Runner-Up kag Second Runner-Up kag ang mga tagdaug ang makabaton sang cash prize kag tour package.
Ang makakuha sang tatlo ka major crowns amo ang magatiglawas sang Iloilo sa national pageants.
