ILOILO CITY – Dugangan pa sang syudad sang Iloilo ang pagabaklon nga mga bakuna batok sa COVID-19.
Ini ang kasunod sang otoridad nga ginhatag ni Presidente Rodrigo Duterte sa mga local government units nga makabayad sang masobra 15% sa advance market commitments sang pagabaklon nga COVID-19 vaccines.
Una na nga nakapirma ang Iloilo City Government sang tripartite agreement kaupod ang national government kag British–Swedish multinational pharmaceutical company nga AstraZeneca para sa advance purchase sang 600,000 doses nga makaigu para sa 300,000 ka residente sang syudad.
Suno kay Treñas, ginahikot na ang bayad sa sini nga bakuna kag posible mahatag sa masunod nga semana.
Magluwas sa AstraZeneca, plano man sang syudad nga magbakal sang bakuna sa Janssen kag Novavax kag madugang pa gid halin gihapon sa AstraZeneca.
Sa Hulyo ginalauman nga magaabot ang bakuna sang AstraZeneca.
Sa subong ginalauman man ni Treñas nga mapasar na sa Senado ang hagna nga gin-aprubahan sang House Ways and Means Committee nga amo ang magapahanugot sa LGUs nga mag-import sang COVID-19 vaccines nga indi pagpatungan sang buwis.
Ginahulat man nga mapasar ang hagna nga ginsertipikahan na ni Presidente Duterte nga urgent nga amo naman ang magapahanugot sa LGUs nga makabakal sang coronavirus vaccines direkta halin sa manufacturers nga wala na sang public bidding.
Nagapasalamat man si Mayor Treñas sa mga negosyante nga amo ang nagabuylog agud masuportahan ang mass vaccination kag ang pondo sang Iloilo City Government para sa procurement sang bakuna.
Isa diri amo ang chairman sang Florete Group of Companies nga si Dr. Rogelio Florete nga labing-una nga nagkomiter nga magahatag sang libre nga bakuna para sa mga empleyado nga nasakupan sang kumpaniya.
