Nagsentro sa pag-antos kag pagbangon ang istorya sang inagihan sang isa ka corporate professional nga tumandok sang Anini-y, Antique apang naggradwar sa West Visayas State University sa Iloilo City.
Ini amo si Ivy Jean dela Serna nga bata pa lamang nabuksan na ang kaisipan nga tuman kabudlay ang pagkabuhi sa kalibutan.
Sa interview sang Bombo Radyo kay dela Serna, iya ginpahayag nga tatlo ka tuig pa lang siya, nagaupod na ini sa iya iloy nga nagapanglaba agud makakwarta.
Ang iya naman nga amay, wala sang permanente nga trabaho gani ini ang nangin inspirasyon niya nga maghimakas gid ini nga makatapos sa iya pag-eskwela.
Apang indi gid nangin paborable ang kapalaran para sa ila.
Sang tuig 2015, isa ka masakit nga hitabo ang nagpabudlay pa gid sa sitwasyon sang ila pamilya kun sa diin napatay ang iya iloy bangud sa balatian.
Matapos naman ang pila ka tuig, napreso ang iya amay sa sala nga wala man sini nahimo.
Sa pihak sini, bisan may mga tion kun kaisa nga ginadumdom ni dela Serna nga kaangay ginadalukan sila sang isa ka malipayon nga pangabuhi, ini tanan naghatag pa gid sang kaisog sa iya agud maghimakas.
Nagbunga ini tanan matapos naggradwar ini sa kolehiyo bilang isa ka Magna Cum Laude nga suno sa iya bangud man sa bulig sang programa sang gobyerno sa ila.
Para kay dela Serna, bangud man sa bulig sang Ginoo sa iya kabuhi nangin posible ang mga bagay nga suno sa iya, kaangay nga nangin imposible sini nga malampuwasan.
Nagbilin man ini sang pahanumdom sa iban nga tawo nga dapat magpadayon lang, mag-focus sa kun ano man ang gusto mo nga malab-ot kag magsalig sa Ginoo bangud wala gid ini nagapabaya.
