Nagduso sang resolution si Iloilo City Councilor Alan Zaldivar sa ginpatigayon nga 15th Regular Session sang Iloilo City Council kahapon nga adlaw, Abril 22, may kaangtanan sa pagpasiguro sang ikaayong lawas sang mga Ilonggo subong nga tion nga nagatagiti ang init.
Suno kay Councilor Zaldivar, bilang chairman sang Committee on Health, dapat lang nga hatagan sang pagtamod kag lihuk ang seguridad kag ikaayong lawas sang mga llonggo ilabi na subong nga tion nga nagatagiti ang init.
Pahayag niya, base sa mga report sang PAGASA, naga-eksperyensya ang syudad sang Iloilo sang mataas nga heat index nga mahimo magdala sang peligro sa ikaayong lawas sang mga tawo.
Paagi sa sini nga resolusyon, mahatagan sang dugang nga proteksyon kag ihibalo ang publiko agud malikawan ang peligro nga dala sang tuman ka init nga tyempo.
Sa pagpatuman sang sini nga resolusyon iga-adjust ang class schedule sa mga eskwelahan, magatahag sang proteksyon sa mga outdoor workers, kag pagasanyugon ang information campaign angut sa epekto sang mainit nga panahon.
Lakip man sa mga tikang ang pagpa-andam sang mga barangay health station agud makabulig sa mga kaso sang heat-related nga sakit kag masiguro ang madasig nga response sa tion sang emerhensya.
Dugang pa ni Councilor Zaldivar, tuman gid ka apektado sang init amo ang mga estudyante kag mga nagaubra sa gwa pareho sang construction workers, traffic enforcers kag delivery riders, gani ginaduso niya ang pagpatuman sang dugang nga pamaagi agud maprotektahan ang ila kaugalingon.
