Gin-ako ni Iloilo City Councilor Atty. Rommel Duron nga nagaplano siya nga batunon ang salakyan nga gintanyag sa iya sang personal ni Iloilo City Mayor Jerry Treñas.
Nahibaluan nga ang tanan nga konsehal sa syudad sang Iloilo ang gintanyagan sang tag-isa ka Mitsubishi Strada nga pick-up sang nagligad nga semana.
Sa interview sang Bombo Radyo kay Atty. Duron, iya ginpahayag isa siya sa may pinakamadamo nga committee chairmanship sa Sangguniang Panlungsod sa diin kinahanglan gid niya ang salakyan para sa iya opisina.
Gin-athag ni Duron nga wala siya nagakinahanglan sang salakyan para sa personal niya nga kinahanglanon bangud bag-o pa man siya nangin konsehal, may yara na siya sang duha ka mga salakyan.
Suno kay Duron, bilang Chairman man sang Committee on Transportation kag Peace and Order sa konseho, masami siya nga nagalibot agud i-monitor ang sitwasyon sa syudad sang Iloilo.
Bangud diri, suno sa konsehal, personal niya nga salakyan ang ginagamit sang iya mga tinawo.
Pahayag ni Duron, sa tion nga matapos na ang papeles sang salakyan nga gintanyag sa iya ni Treñas, nakahanda siya nga batunon ini bangud wala man siya sang may nakita nga malain diri bangud kalabanan naman nga departamento sa Iloilo City Hall ang may yara sang salakyan para sa opisina kag trabaho.
Daw kaangay lamang ini suno kay Duron sa dugang nga mga salakyan kag motorcycle bikes nga ginpanagtag man sa mga pulis agud mapabaskog ang police visibility kasunod sang asud-asud nga krimen sa syudad sang Iloilo.
