𝗜𝗟𝗢𝗜𝗟𝗢 𝗖𝗜𝗧𝗬 — Liwat nga ginpahanumdom ni Iloilo City Councilor Sedfrey Cabaluna sa Iloilo City Police Office (ICPO) kag Iloilo City Traffic Management Unit (ICTMU) nga ipatuman ang ordinansa nga ginpasar sang 2022 kaangot sa pagpangdakop sa mga iligal nga naga-park sa dalan.
Ini nga ordinansa ang ginpasar sa konseho paagi kay Former Iloilo City Councilor Plaridel Nava.
Sa interview sang Bombo Radyo kay Cabaluna, iya ginpahayag nga hugot nga ginadumulian sang syudad ang iligal nga pag-park ilabi sa coastal road sa Brgy. Mansaya kag Loboc, Lapuz, Iloilo City.
Suno kay Cabaluna, tatlo na ka mga patrol car ang nagpadulong sa nasambit nga lugar agud nga bantayan ang coastal road kag ang mga iligal nga naga-park.
Ginpahayag man sini nga may mga nagakaigo nga legal nga lihok nga igapasaka batok sa mga motorista nga magabayolar sang amo nga pagsulundan.
Gin-athag man sang natungdan nga indi lang sa Loboc kag Mansaya ang hugot nga pagdumili sa mga motorista nga mag-park bangud sa tanan nga national, local, and barangay road, bawal man ini.
Nahibaluan nga sang damlag lang, patay gid ang isa ka lalaki matapos nga nakabunggo ang ginamaneho sini nga motorsiklo sa trailer truck nga iligal nga naga-park sa mga nasambit nga barangay.
