Dako ang paglaum ni Iloilo City Councilor Sedfrey Cabaluna nga madakpan na ang mga suspek sa likod sang asud-asud nga motornapping incidents sa siudad sang Iloilo.
Sa interview sang Bombo Radyo kay Councilor cabaluna, iya ginpahayag nga samtang wala pa madakpan ang mga suspek, possible nga nagapangisog man ang iban nga mga may mga plao nga magpangawat sang mga motor.
Pahayag pa niya nga nagakadapat man nga pabaskugon pa ang ordinansa kun sa diin nagarequire sang Closed Circuit Television (CCTV) sa mga nagkalain-lain nga mga establisyamento kag iban pa nga mga lugar agud makabulig nga mas mapadasig ang imbestigasyon sang mga kapulisan sa tion nga may krimen nga magluntad sa isa ka lugar.
Dugang pa niya nga kinahanglan nga magbinuligay sang publiko kag sang mga awtoridad agud nga madasig man nga masolbar ang mga kaangay nga insidente.
