𝗜𝗟𝗢𝗜𝗟𝗢 𝗖𝗜𝗧𝗬 — Nagapati ang Committee on Public Safety and Police Matters sang Iloilo City Council nga kinahanglan sang hugot nga koordinasyon sa tunga sang Bureau of Immigration kag Philippine National Police (PNP) kaangot sa mga illegal immigrants sa Iloilo City.
Sa interview sang Bombo Radyo kay Iloilo City Councilor Atty. Sedfrey Cabaluna, Chairman sang Committee on Public Safety and Police Matters, iya ginpahayag nga tuman ka importante nga mahibaluan kun may yara gidman nga naga-exist nga mga illegal immigrants sa mga foreign nationals sa Iloilo City.
Suno kay Cabaluna, sa subong, wala paman sang may nagdangop sa ila kaangot sa reklamo batok sa posible nga overstaying sang mga foreigners sa syudad.
Ginpahayag man sini kinahanglan anay sang kongkreto nga datus antes paman magpatuman sang mga lihok agud matapna ang iligal nga buluhaton.
Ginpatpat man sini nga dapat lang nga siguraduhon sang kapulisan nga sila ang nagabantay sa mga kaangay sini nga kaso.
Ginalantaw man sang natungdan nga dapat hugot ang pagbantay sang kapulisan sa mga nagasulod nga foreign nationals sa Iloilo City.
Nagpanugyan man ini sa kapulisan nga mangin vigilante agud nga mabantayan man ang iligal nga buluhaton sang mga foreign nationals kag agud gilayon man nga mahatagan sang nagakaigo nga lihok.
