Nagapati si Iloilo City Councilor Sedfrey Cabaluna nga pareho lang ang mga persona nga nag-vandalize sa portalets sa Sunset Boulevard kag sa pader sang Brgy. Lopez Jaena, Jaro, Iloilo City sang damlag lang.
Sa interview sang Bombo Radyo kay Councilor Cabaluna, iya ginpahayag nga okay lang kon mga mural paintings ang ibutang sa pampubliko nga lugar apang kalabanan sa mga naga-vandalize amo ang ginasulat ang ila mga simbolo sang ila grupo.
Suno kay Cabaluna, sa ila paglibot sa syudad, nagakapareho lamang ang simbolo ukon desinyo nga ila ma-obserbahan.
Dugang sini nga bisan ang ‘stroke’ sang pagsulat kon paano ini gin-vandalize ang nagakapareho, rason man nga nakumparar ini sa natabo sa mga portalets sa Sunset Boulevard.
Ginpahayag man sang natungdan nga ipalab-ot nila sa otoridad ang mga na-obserbahan agud nga gilayon mahatagan sang nagakaigo nga tikang.
Nahibaluan nga sang damlag lang, gintuad sang Punong Barangay sang Lopez Jaena, Jaro nga isa ka lalaki ang nakit-an nga nga nagapangkuris sang ila nga dingding.
Suno kay Punong Barangay Bitoy Santiago, may nakakita nga isa ka residente kag gilayon niya ini nga gin-citizen arrest kag gindala sa barangay hall.
