πππ’πππ’ πππ§π¬ βNagpaathag si Iloilo City Councilor Sedfrey Cabaluna nga wala niya ginpunggan si Iloilo City Councilor Ely Estante, Jr. nga magpamangkot kaangot illegal aliens sa Iloilo City.
Ini kasunod man sang ginpatigayon nga committee hearing kahapon nga adlaw sang Iloilo City Council kaangot sa 17 ka mga Undocumented Chinese Nationals.
Sa interview sang Bombo Radyo kay Councilor Cabaluna, iya ginpahayag nga si Councilor Estante ang una ginhatagan sang kahigayunan nga makapamangkot tuhoy sa amo nga kaso.
Suno kay Cabaluna, bilang isa ka abogado, tuyo lamang sini nga ipahanumdom sa konseho nga nahanungod sa sub judice rule rason nga nag-raise ini sang point of order nga nagapahibalo nga may mga ‘risks’ sa amo nga diskusyon.
Ginpahayag man sini nga kabahin sang sub judice rule ang pagdumili nga magkomentar ukon mag-disclose sang mga detalye kaangot sa pending nga mga kaso sa korte.
Ginpanginwala man ni Cabaluna nga nakahibalo siya sa ginpamangkot ni Estante kag wala na sini madumduman.
Gin-athag man sini nga ang iya ginpahanumdom ang para sa tanan kag indi lamang para kay Estante.
Tuyo man ni Cabaluna nga indi ma-dismiss ang amo nga kaso ilabi na sa teknikal nga aspeto sini.
Nahibaluan nga ang 17 ka Chinese nationals ang nadakpan anay sang gin-raid sang otoridad ang gina-alegar nga cybersex den sa Lawaan Village, Barangay Balantang, Jaro, Iloilo City sang nagligad nga tuig.
