ILOILO CITY – Ginplastar ni Iloilo City Councilor Sedfrey Cabaluna, chairman sang Committee on Transportation, ang rason kun ngaa nga naga-isyu sang provisional authority ang iya opisina para sa mga tricycle operators.
Ini ang kasunod sang pagkwestiyon sang duha ka anay chairman sang Committee on Transportation nga sanday Councilors Romel Duron kag Plaridel Nava sa gina-isyu nga provisional authority nagikan sa opisina ni Cabaluna.
Sa interview sang Bombo Radyo kay Councilor Cabaluna, iya ginpahayag nga ang provisional authority ang para sa renewal sang OR-CR sang mga tricycle kag indi para sa ila franchise.
Suno kay Cabaluna, ginsunod lamang niya ang suhestiyon sang Land Transportation Office sang nagpatigayon sang committee hearing ang iya komitiba agud nga istoryahan ang renewal sang franchise sang mga tricycle.
Sa amo nga committee hearing, ginpahayag sang iban nga mga tricycle drivers nga ma-expire na ang ila OR-CR apang ginaproseso pa ang ordinansa para sa prangkisa sang mga tricycle drivers.
Nagpangayo sang suhestiyon si Cabaluna sa Land Transportation Office kag gin-suggest sang ahensya nga mahimo nga maka-release anay sang provisonal authority ang opisina ni Cabaluna.
Sang nakabaton ang Land Transportation Office sang sulat nagikan sa opisina ni Duron nga nagakwestiyon sangauthority ni Cabaluna, ginpa-untat man ang pag-release sang provisional authority nagikan sa iya opisina.
Nakahanda naman ini nga mag-atubang sa tion nga may yara sang mapasaka sang kaso ukon reklamo batuk sa iya.
Wala man ini nagapati nga isa ka misconduct behavior ang iya ginhimo bangud man nagsandig lamang ini sa suhestiyon sang Land Transportation Office.
