Ginklaro ni Iloilo City Councilor Nene Dela LLana nga indi masarangan sang budget sang siudad ang 911 Unified Emergency Hotline ordinance nga ginaduso ni Vice Mayor Love Baronda.
Kasunod ini sang panawagan ni Baronda nga hatagan man sang tion sang konseho ang iya mga proposed ordinance nga wala pa sang committee report.
Sa interview sang Bombo Radyo kay Dela Llana, Chairman sang Committee on Information Technology, iya ginpahayag nga base sa iya pagpakig-angut sa Iloilo City Budget Office, tuman ka dako ang kinahanglan nga kantidad para sa nasambit nga proyekto ilabi na nga nagakinahanglan ini sang maintenance kada bulan.
Suno sa konsehal, ginatuyo niya nga ibalik ang proposal sa bise alkalde kag pamangkuton kun may ara ini sang alternatibo sa pagpatuman sang amo nga sistema.
Ginklaro man ni Dela Llana nga indi pamulitika ang rason sa malawig nga proseso sa ginaduso nga ordinansa ni Baronda, kun indi amo ang tuman ka mahal nga galastuson para diri.
