Gindangop ni Councilor Nene Dela Llana sa Iloilo Provincial Capitol ang iya reklamo batok sa mga social media post ni Iloilo Provincial Information and Community Affairs Office ukon PICAO head Nereo Lujan.
Kasunod ini sa panawagan ni Dela Llana kay Governor Arthur Defensor Jr. nga indi pag-itolerar ang mga aktwasyon ni Lujan batok sa pila ka opisyal sang City Government.
Sa interview sang Bombo Radyo kay Dela Llana, iya ginpahayag nga may paglapas sa ginatawag nga conduct unbecoming of a public officer ang pila ka ginahimo ni Lujan sa social media.
Dala ang mga kinahanglan nga dokumento, nagpatigayon ini sang closed door meeting kaupod kay Dr. Raul Banias bangud nagpadulong si Governor Toto sa Manila.
Suno kay Dela Llana, gin-athag man sa iya ni Banias nga makapila na ka bes nga ginsinggan si Lujan nga untaton na ang iya ginahimo apang wala ini nagasunod.
Pahayag pa ni Dela Llana nga may ara man sang kahilwayan si Lujan nga maghatag sang kritisismo, apang may limitasyon ini bangud isa ini ka public officer kag may mataas nga posisyon sa Provincial Capitol.
Liwat naman nga nagapanawagan si Dela Llana kay Governor Arthur Defensor Jr. nga talupangdon ang isyu kag iya ginsiling nga posible niya ini nga dal-on sa Civil Service Commission kun wala sang lihok batok sa mga akto ni Lujan.
