Ginhangkat ni Iloilo City Councilor Nene Dela Llana si Iloilo Provincial Public Information and Community Affairs Office (PICAO) Head Nerio Lujan para sa isa ka debate.
May kaangtanan ini sa igahatag tani nga bulig ni Iloilo City Mayor Raisa Treñas sa mga kapulisan subong nga madamo sa mga ini ang wala nakahibalo sa pagmaneho sang salakyan kag motor.
Suno kay Treñas, may ara sang iga-train nga mga civilian driver nga magamaneho sang police patrol cars.
Apang ginklaro naman ni PBGEN. Randulf Tuaño nga amo ang Direktor sang Police Regional Office 6 nga base sa polisa sang Philippine National Police, wala ginapahanugutan ang sibilyan nga magdrive sang PNP Patrol vehicle.
Didto na kag nagkomentar si Lujan batok sa tuyo ni Treñas kag nagpahayag nga wala sang nalung-ong ang alkalde.
Kagab-i, ginsabat naman ini ni Councilor Dela Llana pinaagi sa iya social media post.
Suno sa konsehal, maayo ang nangin suhestyon sang City Government agud mabuligan ang mga kapulisan ilabi na kun para man lang ini sa normal roving kag indi para sa mission order nga may ara sang mga specific operational purpose.
Wala man sini napunggan nga hangkatun ang PICAO head nga gintawag pa sini nga idol para sa isa ka debate.
