Ginpatigayon ang isa ka seryoso nga Multi-disciplinary Team Meeting sa syudad sang Iloilo nga ginpangunahan ni Councilor Nene Dela Llana, kaupod ang City Social Welfare and Development Office, Philippine National Police, Task Force on Moral Values Formation, Sangguniang Kabataan, POSMO-Traffic Management and Transport Regulation Office, Liga sang mga Barangay kag iban pa nga ahensya sang ciudad.
Ang katuyuan sang sini nga meeting amo ang pagtan-aw sang epektibo nga solusyon sa nagadamo nga kaso sang mga minors nga na-involve sa gang pareho sang Carabao, BTS kag Snitch.
Sa interview sang Bombo Radyo kay Councilor Nene Dela Llana, ginpahayag niya nga ginpatawag niya ang nasambit nga team agud maplastar ang mga tikang batok sa mga kabataan nga naga-engage sa mga iligal nga aktibidad pareho sang paglapas sang curfew, vandalism, alarm and scandal, kag kinagamo.
Suno sa iya, kinahanglan nga may koordinasyon ang tanan nga sektor agud masolbar ang problema nga ini.
Ginproponer man ni Dela Llana nga panubuan ang oras sang curfew halin sa 8:00 sang gab-i tubtob 4:00 ukon 5:00 sang kaagahon.
Apang ginpunto niya nga dapat istoryahon anay ang mga kabataan bangud may yara sang mga estudyante nga naga night-class.
Ginpaboran niya ang mas temprano nga curfew kag ginpanugyan nga ipatuman ini sa barangay level paagi sa pagpa-uwang bilang senyales sang pagsugod sang curfew.
Dugang pa, ginpahayag man ni Dela Llana nga kinahanglan ipatuman ang mental health talk para sa mga ginikanan agud mas mangin responsable sila sa pag-atipan sang ila mga kabataan.
Ginpanindugan niya nga ang kabataan dapat protektahan kag giya-an sang komunidad, kag ang mga ginikanan may daku nga papel sa sini nga responsibilidad.
