Nagapanawagan si Iloilo City Councilor Jose Maria “Nene” Dela Llana nga ipaidalom sa psychological evaluation ukon mental health screening ang tanan nga taxi driver sa syudad.
Ini may kaangtanan sa insidente sang sexual harassment sa isa ka menor de edad kun sa diin ang suspek isa ka taxi driver.
Sa interview sang Bombo Radyo kay De La Llana, iya ginpahayag nga importante nga masiguro ang psychological kag mental state sang mga taxi driver agud malikawan ang mga insidente nga mahimo magbutang sa peligro sa seguridad sang mga pasahero, ilabi na ang mga kabataan.
Madumduman nga sang Setyembre 27, nadakpan ang 67-anyos nga taxi driver matapos ginhurikap sini ang pribado nga parte sang lawas sang 17-anyos nga babaye nga pasahero sa Barangay Gustilo, La Paz, Iloilo City.
Suno kay De La Llana tuman ka delikado ang amo nga insidente, ilabi na sa mga estudyante nga may ara sang night class kag kinahanglan magbiyahe pauli sa gab-i.
Nagapanawagan man ang konsehal sa mga ginikanan nga bantayan kag i-monitor ang mga ginasakyan sang ila mga kabataan, kuhaan sang ila mga bata sang litrato ang plate number sang salakyan kag ipadala ini sa ila.
Gin-dayaw naman ni De La Llana ang kapulisan sa madasig nga pag-akto kag pagkadakop sa suspek nga ginatudlo nga nanghurikap sa menor de edad.
