Ginpasiguro ni Iloilo City Councilor Nene Dela Llana nga patas, bukas, kag husto ang pagdumala niya bilang preciding officer sa ginpatigayon nga committee hearing para sa 40% nga reduction sang Real Property Tax (RPT).
Ginpabutyag niya nga ginhatagan sang tsansa ang tanan nga konsehal nga magpahayag sang ila opinyon, kag wala sang ginpigos ukon ginpahalin nga wala pa nakahatag sang statement ukon nakapamangkot.
Sa interview sang Bombo Radyo kay Councilor Dela Llana, iya ginpahayag nga naka-motion na si Councilor Romel Duron para sa adjournment kag gin-second man ni Councilor Malabor kag sang iban pa nga miyembro. Suno sa iya, posible nga wala lang nabatian ang motion antes siya nagtindog, kag sang ulihi ginpadayon na lang ang motion to adjourn.
Ginpabutyag man ni Dela Llana nga ginhatagan niya sang husto nga oras si Councilor Sheen Marie Mabilog para magpresentar sang iya mga pamangkot kag technical nga datos. Ginhambalan niya pa ang mga resource persons nga maghatag sang mga dokumento nga kinahanglanon ni Mabilog.
Ginpabutyag niya nga si Councilor Mabilog pa ang may pinakalawig nga oras sa tanan nga naghambal sa hearing, kag bisan tingbon ang oras sang iban, mas lawig gihapon ang kay Councilor Mabilog.
Ginpaathag man ni Dela Llana nga sa iya opening statement, ginpanindugan niya ang prinsipyo nga dapat patas, open, kag fair ang hearing. Indi siya gusto nga may madulaan sang tsansa ukon may matago nga impormasyon.
Apang ginklaro man niya nga indi niya makontrol ang reaksyon sang iban nga miyembro nga nag-attend sang hearing.
Sa katapusan, ginpanugyan ni Dela Llana nga sa masunod nga committee hearing, kinahanglan may microphone na ang tanan nga magapamangkot kag magpresentar, kag may specific nga oras ang tagsa ka konsehal para indi maglapaw kag para mas maayo ang dalagan sang diskusyon.
