Naintindihan ni Councilor Nene Dela Llana kun sa diin naghalin ang kaugot ni PICAO head Nereo Lujan batok sa mga ginahimo sini nga pagpakamalaot sa opisyal sang City Government.
Sa interview sang Bombo Radyo kay Dela Llana, iya ginpahayag nga ginkasuhan ni anay Mayor Jerry Treñas si Lujan sang cyber libel kag asta sa subong nagapadayon ang kaso.
Apang, ginpunto sang opisyal nga indi dapat pagdalahigon ni Lujan si Mayor Raisa Treñas.
Ini bangud wala ini sang sala sa nahimo man nga akto ni anay Mayor Jerry batok sa iya.
Suno pa sa konsehal nga kun may ara sang wala nanamian si Lujan sa syudad, mas maayo nga maghatag ini sang suhestiyon imbes nga puro lamang ini kritisismo.
Pahayag pa sang konsehal, dapat magpakita sang political neutrality kag professionalism si Lujan kag mangin mahinalungon sa paggamit sang social media bangud public information officer ini.
Ginsinggan man sini si Lujan nga dapat kay nagatigulang na ini, indi na ini magbinastos bangud kun ano ang iya nga ginahimo, nagareflect ini sa trabaho niya.
