Ginbalibaran ni Iloilo City Councilor Dr. Candice Tupas ang gintanyag sa iya nga brand new nga salakyan ni Iloilo City Mayor Jerry Treñas.
Sa interview sang Bombo Radyo kay Councilor Tupas, iya ginpahayag nga indi man niya kinahanglan ang bag-o nga salakayan kag mas maayo nga ihatag nalang sa executive nga mga office kaangay sang mga healthcare ang salakayan nga para sa iya.
Suno kay Tupas, ginhatagan man siya sang tinion ni Mayor Treñas nga makadesisyon kun batunon niya ukon indi ang tag-isa ka Mitsubishi Strada nga pick-up nga ipanagtag sa tanan nga mga konsehal sa syudad sang Iloilo.
Pahayag ni Tupas, ginrespeto man sang alkalde ang iya pagpamalibad bangud makafunction man siya bilang councilor kag radiologist apisar wala siya sang bag-o nga salakyan.
Sa pamangkot naman kun sa diin naghalin ang pondo nga gingamit sa pagbakal sang mga salakyan para sa mga konsehal, wala na nagpangusisa pa si Councilor Tupas kay Mayor Treñas.
Nagalaom man ang natungdan nga makadto ang salakyan nga para sa iya sa departamento nga dako ang kinahanglan sang transportasyon para sa trabaho.
”I hope makadto gid sa sakto nga department ang salakyan. Kay ako personally, I can function on my own… I can function as a City Councilor, I can function as a Radiologist, nga naga-usar sang akon nga own nga salakyan…”
