Gintawag nga binutig ni City Councilor Romel Duron ang alegasyon ni former City Mayor Jed Patrick Mabilog nga may 200 ka units sang Grab car si Mayor Jerry Trenas.
Sa interview sang Bombo Radyo kay Duron, Chairman sang Committee on Energy and Public Utilities, iya ginpahayag nga handa siya nga magresig kun mapamatud-an ang amo nga alegasyon.
Suno kay Duron,siya ang makapamatuod nga binutig ini nga pahayag ni Mabilog bangud nga nangin Legal Counsel ini sang Transport Network Company (TNC) nga Grab.
Suno kay Duron, may limit tubtob sa tatlo lamang ang franchise nga makuha sa sin-o man nga magsulod sa operasyon sang Grab.
Apang dapat nga maaprubahan pa ini sang Land Transportation Franchising and Regulatory Board (LTFRB)
Dugang niya, dapat nga pamatud-an man anay sang aplikante nga may yara ini sang financial capacity kag may nagakaigo nga garahe para sa units.
Suno pa sa iya, imposibble man nga makagamit sang dummy bangud istrikto ang proseso kag ginahibalo gid ang background sang sin-o man nga luyag magsulod sa operasyon.
