𝗜𝗟𝗢𝗜𝗟𝗢 𝗖𝗜𝗧𝗬 — Indi kumbinsido si Iloilo City Councilor Romel Duron sa nangin sabat sang Bureau of Immigration sa Iloilo City Council kaangot sa mga Undocumented Chinese Nationals.
Ini kasunod man sa ginpatigayon nga committee hearing subong nga adlaw, Hulyo 8, 2024.
Sa interview sang Bombo Radyo kay Duron, iya ginpahayag nga wala sang data ang Bureau of Immigration nga ginplastar bangud suno sa ahensya, isa ini ka sensitibo nga detalye rason nga indi kinahanglan nga iwarawag sa publiko.
Suno kay Duron, kinahanglan pa sang ahensya nga magkoordinar sa ila nga central office sa Manila antes maghimo sang isa ka tikang, kaangay na lamang sa ila nga pagtambong sang committee hearing sa konseho.
Ginpahayag man sini nga posible liwat nga magpatawag sang hearing agud masabat ang mga palamangkutanon nga ila tuyo mabatian halin sa ahensya.
Sang ginpamangkot naman ang Bureau of Immigration kun pila sa ila nga data ang illegal immigrants, nagsabat ang ahensya nga kinahanglan anay nila sang formal complaint batok sa mga illegal immigrants antes makapaguwa sang kabug-usan nga data.
Santo naman sa 2023 data sang Department of Tourism (DOT), may yara sang 46,565 ka mga Chinese nationals ang nagpadulong sa Western Visayas, kon sa diin, naka-record ang Iloilo City sang 1,954 Chinese nationals.
Samtang, ang Iloilo Province naman ang may 350; ang Guimaras ang may 48, kag ang Aklan ang may pinakamadamo nga nagpadulong nga Chines Nationals nga may yara sang 40,736.
Nagapati naman si Duron nga nagapadayon ang iligal nga mga aktibidad sang foreign nationals sa syudad apisar nga ginpahayag sang kapulisan nga wala sila sang data nga nabaton kaangot sa illegal activities sang illegal immigrants.
Magapatuman naman sang close door meeting ang konseho kaupod ang nasambit nga ahensya kag si Iloilo City Mayor Jerry Treñas agud nga maplastar ang mga reports kag data nga ginapahayag sensitibo kag indi kinahanglan ipaguwa sa publiko.
