ILOILO CITY- Nagpangayo sang pasaylo si Iloilo City Councilor Romel Duron bangud sa iya nangin aktwasyon sa session sang damlag lang.
May kaangtanan ini sa ila pagsabtanay ni Councilor Sedfrey Cabaluna kag gintawag ni Duron nga inagi ang mga sabat ni Cabaluna sa iya.
Sa interview sang Bombo Radyo kay Duron, iya ginpahayag nga nainit lang siya sa pamaagi sang panabat sa iya sang kaangay nga konsehal.
Suno kay Duron, bilang isa ka senior citizen, nagakahubsan man ini sang pasensya.
Gin-athag naman niya nga wala ini sang dumot ukon ano man nga negatibo nga balatyagon sa bisan sin-o man kag patas ang iya pagtrato sa tanan.
Matandaan nga una na ginpakamalaot si Duron sang LGBT Affairs Office sang syudad bangud sa paggamit sini sang tinaga nga inagi bilang pagpang-insulto.
Sa interview naman sang Bombo Radyo kay Cabaluna, iya ginaabi-abi ang ginhimo ni Duron nga pag-sorry.
Suno sa iya, wala ini sang ano man nga pagpamersonal kay Duron bangud kabahin na sang ila trabaho sa konseho ang pagbanggianay.
Nagpangayo man ini sang pasaylo sa iya nangin papel sa natabo nga pagbaisay nila ni Duron.
