𝗜𝗟𝗢𝗜𝗟𝗢 𝗖𝗜𝗧𝗬 — Nagapati si Iloilo City Councilor Rommel Duron nga responsibilidad sang executive department nga imbestigaran ang 17 ka mga Chinese Nationals nga nadakpan anay sang gin-raid sang otoridad ang gina-alegar nga cybersex den sa Lawaan Village, Barangay Balantang, Jaro, Iloilo City sang nagligad nga tuig.
Sa interview sang Bombo Radyo kay Duron, iya ginpahayag nga kun ginaubra lamang sang executive department ang ila katungdanan, indi na kinahanglan kuntani nga i-call out sang legislative department ang ila nga atensyon.
Suno kay Duron, kadamo sang mga departamento ang imbolbado sa pag-raid sang otoridad sa mga Chinese Nationals nga ginlaragway pa sini nga masami wala nagakakooperar sa syudad, kaangay na lamang sa pagtuon sang Hiligaynon.
Gin-athag man sini nga tuyo sang city council nga imbestigaran ang kaso bangud ini ang isa ka makaalarma para sa mga Ilonggo.
Gintawag man ni Duron ang atensyon sang Bureau of Immigration agud sabton ang mga issue tuhoy sa mga undocumented nga Chinese nationals nga ginapatihan facilitators para sa Filipino kag foreign clients sang cybersex operation.
Kun balikan, Nobyembre 4, 2023 ginpatigayon ang police raid matapos nga nag-isyu si Judge Maniba sang search warrant sa lugar kun sa diin gina-alegar nga naga-operate ang respondents sang cybersex den.
